Gamalnorsk sau er ein rase med stort genetisk mangfald. Rasen har unike eigenskapar i form av at sauene er tilpassa det landskapet dei historisk har levd i, og ei driftsform der dei i stor grad har greidd seg sjølve. Mange av eigenskapane til rasen er knytt til akkurat det å greie seg sjølve. Enkle lammingar, sterkt flokkinstinkt, motstandskraft mot sjukdom, evna til å byggje opp feittreservar, dobbel ullfell, at dei feller ulla, godt morsinstinkt og nøysemd er svært viktige trekk for rasen. Rasen har stor historisk verdi i seg sjølv, men også som landskapspleiar og produksjonsdyr for framtida. Gamalnorsk sau er eit svært viktig beitedyr for å kunne bevare kystlyngheia som er ei truga naturtype. Rasen gjev relativt små slakt samanlikna med mange nyare saueraser, men gjev kjøt av høg kvalitet og med ein unik smak. Det viktigaste for rasen er at dyra skal vere funksjonelle, det betyr at eigenskapane deira skal sikre god dyrevelferd under utedrift, i kystlynghei som dei historisk er knytte til.
Informasjon fra Norsk Villsaulag, les mer her